لوحة الفنان إبراهيم عبدالرحيم شريف
من ديوان تلايا الليل للشاعر إبراهيم الأنصاري
وينك انت...
وينك انت.. وينك انت..
تنطرك عيني وروحي والمدى وشوق العواطف
وينك انت...
تنطرك سكة حنيني والوله واحلى السوالف
وينك انت...
تعبت عيوني اتحرى واتريا ييتّك
تعبت عيوني اتنطر واتمنى دشتك
ياسفر ليل الاماني
ياصبح بيّت عيونه فى السهر وعيّ يحاتي
ياضوا شمسي وأمسي
ياوله اول حياتي
وينك انت...
***
هالكثر قسوة عيونك ...
هالكثر ليلّك يطـــوّل
هالكثر غيم المسافة ...
مارضى غيثك يحوّل
ياحسافة سهدة عيونك
وضجة هالمشاعر
ياحسافة غفلة الدنيا
وزماني توّه يتمشى خواطر
ياحسافة توني انا... بعدي انا...
طفلة تتحلم وترسم كل امانيها اف دفاتر
تربط الليل وتعجفه وتتركه ويا الظفاير
توني انا
ولو تسافر ...
ياوله كل المشاوير البعيدة
ياوله عمري اللي ماينسى حنانك
بآتريا...
بآنتظر طلة ربيعك
ياربيع كل المواسم
يافرح في عيوني حالم
بآنتظر...
وبيظل حنيني يسائلك كل مرة انت...
وينك انت...
وينك انت...
إبراهيم الأنصاري
*****
ورده ولا تذبل
خذني في لهفتك وارحل
خذني بعيد
أعبر غيمة الأيام
والآلآم
وخشني في الصدر عصفور
يتمنى تلايا الليل
يغني للفجر والنور
ويسرح في الضوا شارد
يصحي الشمس بالتغريد
خذني بعيد
سكني الأمل والروح
عطني فرحة الدنيا
وأمان الكون
وازرعني فْ رياحينك
نبتة ماي
تتحدى العطش والخوف والغربه
وتكبر في العمر ورده
تتفتح على غصونك
ولا تخونك
ولا تذبل ... ولا تذبل
******
خذني في لهفتك واعبر
محطات الفضا وسافر
على حدود المدى
وأسأل ...
تباشير الندى والغيم
وتلاوين السما والغيب
عن الآتي
عن المجهول
وغيّر عمري وأيامي
وخوفي وليلي وآلامي
والباقي من احزاني
الى الأجمل
الى الأجمل ...
خذني في لهفتك وارحل
إبراهيم الأنصاري
*****
وانا سارح
وانا سارح ...
لقيتك ياي تسألني
عن الماضي ...
عن الأحلام ... عن الأيام
لقيتك ياي تسألني
وتحلف لي بكل كتاب
وتوعدني ... تمنيني
بأمل جذاب
وتهتف لي ... ياكل الناس
يا أغلى الناس
يا شمعه نوّرت دربي
يا بسمه ورّدت دربي
يا كل الناس
انا حبي أبد ماخُونْ
أبد ما خُونْ
مثل بسمة طفل حيران
نسيت غدرك
نسيت طبعك الخوّان
ورحت بعيد ... رحت بعيد
انا وياك
وتناسينا الأسى والنوح
تراضينا
وزرنا بحور
وردينا
عطر وبخور ... ردينا
أمل بالنور ... واحنا ندور
واحنا ندور
***
في حديقة شوق مليانه
هنا وشموع
رد الليل يسألني
بأسى ودموع
عن أحوالك
رد الليل يسألني
بأمل مجروح
بكل لجروح
عن أخبارك
لوان الأسى ... كل الأسى
وياالسهر راجع
لوان الهجر ... مثل اليمر
مثل الألم ... مثل الندم
جارح
أحب وياك
اكون وياك
انا سارح
إبراهيم الأنصاري
*****
واحنا صغار
واحنا صغار
تعاهدنا ... تحالفنا
وصلنا بعيد بالأحلام
قلنا مول ها الأيام
لوشيصير ... ماتقدر تفرقنا
لوشيصير ...
جلمة لوم مابنقول
دمعة شوق مابتطول ...
ولابتقدر تعذبنا
***
واحنا صغار
تحدينا الحزن والليل والأقدار
تحدينا الألم والشوق والتذكار
رحنا بعيد ...
جفنا العيد ...
عشنا أسفار
واحنا صغار
خذنا قلوب مزروعه
بأمل وأزهار
بصبر جبار
قلنا مول ها الأزهار
مابتموت ... مابتطيح
لودارت عليها الريح
ولوزادت عليها النار
***
واحنا صغار
واحنا احباب
فوق صفحات الف كتاب
فوق الباب
نقشنا حروف اسامينا
حجاوينا
كتبنا اشعار
رسمنا قلوب فرحانه
مليانه
اماني كبار
وآتلفت عساني آجوف
ذيج لحروف
آلاقي الليل والأحزان
وآجوف الشوق والحلفان
صار تذكار
شاقول اليوم ياغدار
يلست آتذكر الماضي
وفى عيوني دمع محتار
حزن واشواق
جفت اوراق
متلايم عليها غبار
كلتها النار
محروقه بأسامينا
بامانينا
واحنا صغار
واحنا صغار
إبراهيم الأنصاري
*****
لو عيونج
من تلاقيني عيونج
من يسافر بي خجلها
العمر،يصغر، وتخضر كل مسافاته البعيده
والحلّم ، يكبر وتزهر كل محطاته الجديده
والامل يضوي قناديل التمني
والحزن يطوي عذاباته ... ويغني
والندى صبحه يتجدد
والشير غصنه يتورد
والسفر يملا الوجود
من تلاقيني عيونج
من يسافر بي خجلها
من تسائلني حبيبي
والشفاه ترجف مشاعر
والسؤال يرسم خواطر
قول لي يا عشقي ... ياشاعر
قول لي ياليلي وشجوني
قول لي يا خوفي وظنوني
قول لي يا شاعر عيوني
اشكتبت انت اف عيوني
من تسائلني عيونج
عن عيونج والشعر واحلى قصيده
أسأل حروفي الشعر
شنهو الشعر
شنهي القصيده
أسأل حروفي ... وترد
الشعر اهو الجمال
الشعر روعه وخيال
الشعر حيرة سؤال
والسؤال ...
اشلون آصور فرحتي
واكتب عن عيونج شعر
اشلون آلون كلمتي
واسري مع احلامج عطر
اشلون آسولف والسطور
ترفض يغازلها الحبر
اشلون آصور لج شعر
وانتي المعاني كلها ... انتي الحروف
وانتي المشاعر كلها ... انتي الطيوف
اشلون آصور لج شعر
اشلون آغني لج محال
وانتي الجمال
كل الجمال
وانتي الشعر ... كل الشعر ... وانتي القصيده
إبراهيم الأنصاري
*****
لا تعترف
صعبه شعورك والحنيـن يقـدر مع الخـوف ينوصـف
وصعبه ظروفي والسنين تقـدر من الصمت تنجـرف
فجـــرٍ بدون شمس وندى صعبـــه مع الليـــل يأتلـف
امســـح دموعك لا تبـوح واحــذر جروحــك تنكشف
لاتعترف
****
أشواقي موصـوده بدموع وعيـــــوني ممنـوعه ترّف
مزروعــه فى مـايٍ زُلال ومجبـــوره اوراقـي تجـف
احلامنــا فى الدنيا طيــور وريشٍ على الفرحه يصف
نتنفــــس اكسيـــر الحيــاه بس دمنا فى اللـون مختلف
****
ادري تحبنـي من زمـــان وتـــدري احبـــك واعترف
نبض المحبـــه لي ســلام وذنبٍ فى ظنهـــم نقتــرف
من جيت فى هاذي الحياه وليلي فى يومـي منتصـف
امســـح دموعك لا تبـوح واحــذر جروحــك تنكشف
الوقت بلســــم والسنيـــن لابـــد تجبـــرهـــا وتجف
****
صعبه ظــروفـي والسنين تقـدر من الصمت تنجرف
وصعبه شعورك والحنين يقــدر مع الخوف ينوصف
لاتعترف ... لا ... تعترف
إبراهيم الأنصاري
*****
كل مابغيت
كل مابغيت
آشرح إحساسي وآقول
يسرقني خوفي وآبتعد
كل مابغيت
آحس إنج تبعدين
عنّي مسافات وآرد
ودي آقول
ودي آبوح لج وآعترف
إني آحبج من زمان
ودي آقول لكني خايف
من عذاب ردج عليّ
يمكن يكون ردج عليّ
أصعب من احزان الليالي
من سؤالي
من عذاباتي وحنيني
يمكن تقولين ما احبك
وما طرى أسمك على بالي
عجيبة ... أنت تحبني
وآضيع
وكل شي يروح
وتبقى الجروح
أكبر من احساسي بضياعي
أكبر من آلامي وصمتي
آنا ...
انا آحبج ... ذي حقيقة
يمكن ظروفج تمنعج إنج تحسينها معاي
يمكن ...
بس إنتي معاي فى كل مكان
احساس يعذبني وأمان
احساس يحيرني وأمل
خشيته عنج من سنين
الحين ... الحين دريتي اشكثر انا آحبج
لوبعد تبقيني يا حبيبه آقول
إبراهيم الأنصاري
*****
فى دقيقه
فى دقيقه ... مااصدق إني جفتج او لقيتج
او صبحتي لي حقيقه
وصوره أجمل من خيالي ...
من عرفت الحب معنى واكتشفت انا طريقه
وانتي فى بالي وكياني
آه ياقسوة سنيني
ليش مالاقت عيونج دفقة احلامي وحنيني
آنا آحبج ... عايش بحلمي آنطرج
ويوم لقيتج ... عشت فى كل المشاعر البعيده والأماني
وأهدأت روحي فى ظلج ... تسألج
ياترا قد ما آحبج
انت ظلي ... انت أمسي وباجر اللي ماهقيت اني اجوفه
تسأل عيونك عيوني جان احبك ... ياترا اشقد احبك
الكلام يعجز يفسر
فى دقيقه
اصبحت كل المعاني كلمه وحده
اعشقك ... انا احبك ... واكثر اكثر من احبك
ياحلم اصبح حقيقه
ياحلم أصبح حقيقه
إبراهيم الأنصاري
*****
عناوين الدوار
هاتي اللى يقدر ينتظر
وحبج مواسم للمطر
وانتي ولا نفضت شرار
هاتي اللى يقدر ينحصر
بين المراكب فى البحر
وانتي عناوين الدُوار
لآني ...
لآني على شراعج سفر
ولآ نتي وسط موجي فنار
انا بحر وانتي بحر
وصعبه نصير شط وقرار
إبراهيم الأنصاري
*****
عكس الريح
بعكس الريح
جابل مركبي وسمّر
بعكس الرّيح
وزاد الرّيح
وعاند مركبي وعلاّ
بعكس الموج
بعكس الماي
وضد الرّيح .
إبراهيم الأنصاري
*****
سمعت انك
سمعت انك ياي متعنيّ تّبيني
سمعت انك سألت الناس ... كل الناس عنّي
عن مُكاني ...عن زُماني ... عن ماياني
خَبّروني
قالوا هَمّك ... كل هَمّك ...
بس تُوايهني تِيني
وشْ تَبيْ بي .. وش تِبي الحين فيني
وينك أوّل يوم عذبني حنيني
وينك أوّل يوم سهرّني ونيني
تلتقيني ... لا ...
انا ماني خالي ياغالي مثل خُبركْ زُمانْ
لا تثير فيني العواطف
لا تحيّرني معاك
انطفى شوق المحبة
ابتعد عني تراني ماني ذاك اللي تخبَره
ماني ذاك اللي مِديم انت على باله من أوّل
مابقى حالي على حاله انتهى كل شي تبدل
واللّي ياي ودّك تقوله ... لاتقوله
أنا حبيت والتقيت منهو يحبني
ولو تبيني ما أبيك
ولو تِيني إشلي فيك
ابتعد عني وخلني لا تثير فيني حنيني
اشكثُر حبيتك انا
اشكُثر كنت آتمنى
يكبر ويبقى هوانا
اشكثر داريت
اشكثر حنيت
اشكثر لوّل آيي لك وماتيني
ابتعد عني وخلني لا تثير فيني حنيني
خلني عايش فى امان
انا ماني خالي ، ياغالي ، مثل خُبرك زُمان
انا حبيت
انا حبيت ...
إبراهيم الأنصاري
*****
سألتيني
سألتيني قبلْ مده
هواك فلان .. هواك هاذي ...
اش تاليه ... واشْ حده ... ؟
سألتيني وقلتي لي حجي يجرح
حجي يذبح ...
هواك فلان ... هواك هاذي ...
مانيه ... خلاص الحين ... حلاص
عزمنا بنرده ...
وتركتيني آعيش بروحي هالدنيا
اعيش وكلمتج ف أذني ... تعذبني ...
تحيرني بلا معنى
ثلاث سنين
ويتيني ... يتيني
عقب ما غيرت ليام ... شكل لحلام
شكل كل شي عرفته وياج وتعده
يتيني
عقب ما قلبي المطعون رفض يخضع
رفض يسأل
وعرف اشلون يتعامل ويتحدى
وقلتي لي
أبيك فلان ... أبيك أنت
أبي قلبك ...أبي وده
خل نرجع
ورديتج ... صديتج ...
جاوبت السؤال اللى سألتيني قبل مده
سؤالج ذاك ... ذي رده
ماأبيج ... ماأبيج ... ماأبيج يافلانه
يافلانه ...
هجرتيني ... نسيتيني ... تركتيني ...
ثلاث سنين
تجرعت الصبر فيها ... تجرعت الخيانه
تجرعت القهر فيهــا ... وأشكال المهانه
تصبرت ... تعذبت ... تألمت ...
ودوري اليوم ... دوري اليوم آرد الأمانه
يافلانه ...
سمعيني ... لاتقولين تبيني
خلاص انا اللى ما أبيج
ولاودي يمر اسمج
على لساني ولا طاريج
خلاص ... كل شي وصل حده
خلاص كل شي وصل حده
إبراهيم الأنصاري
*****
روح الندى
هتفــت بصوتي لج مشتـاق هلا عمري ... هلا واهله
هــلا بكل الحسـن والزيــن هلا بنـــور الفجــر واهله
هــلا بعــودٍ درز ريحـــان هلا بـــدوح النــدى واهله
هــلا بنبــع الشهـــد مجراه غديـــر المـــاي في الظله
هلا بصوت المطر لى طق على الدنيـا بـــردي همله
هـــلا بروضٍ على الوادي نثـــر فوق الـــزهـــر فله
هـــلا بكل الحلـــى والزين هلا بطـــولٍ زهـى بنشله
غـــــزاله والشعـــر ليلـــي عروســـه محنيــة واحلى
عذيبـــة الصوت والمبســم رضابـه من عســـل نحله
هـــلا بكل الشـــذا والطيب هلا بكل الغـــــلا واغـلى
هتفـــت بصوتي لج مشتاق هلا عمــــري هلا واهله
إبراهيم الأنصاري
*****
تمنيتج
تمنيتج معاي انتي
تصيرين العمر كله
تصيرين الفرح والليل والأحلام
تصيرين الأمل والشوق والأيام
تمنيتج ...
وهَقيتْ ان الوفا يسامر قلبج النساي
ولقيتج ...
فرحة منسيّة تعيش بحرة فى ذكراي
تمنيتج ندى يرّطب شقا روحي
وأمل يكبر بليّا أحزان
يواسي قليبي الولهان
ويخلي لي لو وين آروح
حزاوي شوق تتمناج
وآتم أهواج
ويتم أسمج حجي وده يوافيني
وأمل شوقه يسليني على طرياج
وآخاف القاج بعد باجر
وأنتي ماتغيرتي وأظل ناطر
تصيرين العُمُر كله
فرح وأحلام للآخر
إبراهيم الأنصاري
*****
اخوان
اخوان
تقولين خَلْنا نصير اخوان
اشلون نغيّر السّما
نعطي القُمرْ
غير السُفر ألوان
اشلون نخلي الفرح ...
كل الفرح
ديرة ألم واحزان
***
اخوان
تقولين خلنا نصير أخوان
اشلون نرضى تنتهي
قصة محبتنا
نبتعد ونروح
ننذبح بجروح
واحنا بعدنا احباب
ماجاف الألم والليل خواطرنا
ولا قالت شفايفنا
كلمة لوم
ولاذاقت أمانينا
أسى وحرمان
***
اخوان
تقولين خلنا نصير اخوان
اشلون
واحنا اللى تعاهدنا
وقلنا مابنبجي يوم
وقلنا فى رسايلنا
أحبج دوم
أحبك دوم
يافلان ...
أخوان
تقولين خلنا نصير أخوان .
0 تعليقات