لوحة الفنان عمر الراشد
من ديوان تلايا الليل للشاعر إبراهيم الأنصاري
راية محبة
شنهو معنى إني آحبـــك ... وشنهو معنــى انك تحبني
وشنهو معني اني آعزك ... وانت من قلبك تعزنـــــــي
وشنهو معني ان احنا واحد ... انا منك وانت منــــــي
شنهو معنى ذي الحقيقه ... اللى فى ظنك وظنــــــــــي
دام رضينا ... من جهلنا ... نحرق قليب الرحيمه
ننكر العشره القديمه ...
نسرق الفرحه ونمضي ... فى متاهاتٍ عتيمه
نقلب الآيه الكريمه
(المؤمنون أخوه) وننسف ...
كل معانيها العظيمه
***
شنهو معني إني آحبك ... وشنهو معني انك تحبني
شنهو معنى ذي الحقيقه ...
دام رضينا ... نبدأ انعادي بعضنا ... ونتصارع
دام رضينا ... نبدأ انخالف هدفنا ... ونتراجع ...
للورا ... من غير بصيره ... أو تفكر أو تأني
واحنا اللى ماحسبنا نقدر أف يوم انتفارق
تبتعد وتروح عني ... تنسى مابينك وبيني
والسبب لازم نفرّق ... دون أوهام ... ونصدق
السبب منك ، ومني ...
السبب منك ، ومني
هاذي معني اني آحبك ... وهذا معني انك تحبني
***
لا تضيع ما بنينا في عمرنا
لاتحطم كل أمانينا وأملنا
الوطن لِحمه ومواقف ... عدل وحقوق ومطالب
الوطن رحمه وتآلف ... حب وإخلاصٍ وواجب
الوطن راية محبه ودنيا وأحلام وتمني
الوطن أنت ... الوطن انا... الوطن امنا وعزنا
الوطن دين ومبادىء واخوه وآيادي تبني
الوطن ما هو مذاهب
ولا هو شيعي ولا هو سني
ولا هو شيعي ولا هو سني.
إبراهيم الأنصاري
*****
أمى الحنون
آه ... ياكل الحياه ... وياأول الدنيا ... والنفس والروح
آه ... ياصبحي النادي ... وهدأة افادي ...
وغفوة عيوني أف سكون
آه ... ياأمي الحنون
***
آه ... ياأمي الحنون
يابخت منهو حفظ عهدج ... وعزّج
يابخت منهو بروحه ومهجته فدا ترابج ... وبرّج
يابخت منهو تيدد فى بحر عينج
وصلى ركعتين ...
وأحضنج كعبه ، وجبله ... فى فروضه والمناسك
وصرتي انتي ... حبه انتي
د انتي ... عمره انتي
والعهد كله ... والعمر كله ... وديْن
وماارتضى إلايعزج
ويحفضج ... وأرضج يصون
***
آه ... ياأمي الحنون
من وعيت الدنيا وانتي ... فى عيوني ...
فى وله شوقي وشجوني
فى شرآيني ... فى دمي ... والفصيله
ياهبايب جوي الدافي
يانسايم قيضي الوافي
يامشاتل ، يا بساتيني الجميله
ياأصيله ...
خذت من طيبج ، ومايج ، ومن ترابج
ومن عسل ثمرج ، وتمرج ... والنجيله
كل تعاليم المحبه ، والسماحه ... والأصول ...
والفضيله ...
صار أسمج أهو أسمي ، وصرت انا
ولدج الساكن فى ذاتج ، فى عروقج
فى دفا قلبج وروحج ... والعيون
***
آه ... ياأمي الحنون
يابخت منهو عقب غيّه وعقوقه
أبتدا يطوي المسافه
ويوصلج عقب القطيعه
وانتي عنه اتسامحين
وتحضنين قلبه وروحه
وتسئلين ... عن كل ظروفه
وأسباب ماكان وعزوفه
وأشلون أغواه الغريب
وهــــو الـحـبـيـب ...
وتعدلين ... بينه وشِقِيقه
وتفرشين ... بالحب طِرِيقه
العدل ... للبيت قوه
وأحنا أخوه ..ِ.
أحنا أخوه ...
ودونج انتي مانكون ...
ومن نكون ....
ياامي الحنون
ياامي الحنون
0 تعليقات