لوحة الفنان إبراهيم عبدالرحيم شريف
من ديوان تلايا الليل للشاعر إبراهيم الأنصاري
ياوطن
اكتبوا عنك شعر
اوصفوك بأحلى شعر
ارسموك بسمه على شفاف الندى
سافروا وياك وطافوا كل مكان
سكنوك بين النجوم
واكتبوا اسمك على حدود السما
يابوا الشمس وارسموها فوق شير كل الوطن
خضّروا ليل التعب ... وخلوا الدنيا نهار
اكتبوا مليون قصيدة
رددوا احلى الأغاني
طوّعوا كل الحروف
اكتبوا احلى الكلام
وخلصوا كل الحبر
اكتبوا عنك شعر
اوصفوك باحلى شعر
وانا شاقول عنك انت
لى بغيت آكتب قصيدة
اوقفت كل المعاني
جفت حروف الكلام والدفاتر والسطور
مابقت فى الدنيا كلمه تقدر انت توصفك
انت عنوان الحياة ... انت معنى للحياة
انت نقطة فى عيون الكون
ابتدا منها الوجود
انت شي من غير حدود ...
انت شي من غير حدود ...
ما أقول عنك قصيدة
اكتبوا مليون قصيدة
طوعوا كل الحروف
وخلّصوا كل الحبر
اكتبوا عنك شعر
اوصفوك باحلى شعر
إبراهيم الأنصاري
*****
ياوطنا
ياوطنا ... انت حبنا ...
انت غايتنا وأملنا
انت ديرتنا واهلنا
انت عزنا ، انت عزنا
ياوطنا
***
ياوطنا... انت علّمنا هواك
اشلون نعامل ... من يحبنا
اشلون نجابل ... من يضدنا
اشلون نكون غيث ومطر
واشلون نصير شمس وسفر
حق البشر ... كل البشر
***
ياوطنا... انت علّمنا هواك
اشلون نجازي بالمثل ... وقت القهر
واشلون نعادي بالفعل ... عند الخطر
واشلون نحب ... واشلون نود
واشلون يرد حبنا غضب
نار ولهب ... نار ولهب
***
ياوطنا... انت علّمنا هواك
اشلون نصير ... مثل العسل فى الرِّيج
واشلون نكون ... كُبرْ الأمل فى الضِيّج
واشلون نكون طِيب وعطر ياسمين
واشلون نكون طيبين
واطيب من الطيبين
لكن حزة الحزه
نصير أعصار
مع اللى يستغل ودنا
مع اللى يحاول يضدنا
ندوس النار ...
ندوس الحقد والأشرار
نصير أعصار ... نصير أعصار
ولايهمنا
هاذي احنا ... هاذي احنا
***
ياوطنا
انت حبنا ... انت ديرتنا واهلنا
انت غايتنا واملنا
انت عزنا ... انت عزنا
ياوطنا
إبراهيم الأنصاري
*****
على وعدي معاج
على وعدي معاج ياديرة الطيبين
رجعت واشواقي مكثرها
كثر ودي ... كثر لسنين
أشيل الحب والذكرى
أشيل الحسره فى قليبي
وحزن من فارق الأحباب
وآمد الخطوه وعيوني
يمنيها الصبر توصل ... جريب الباب
وصبر ... أشقد صبر ينطاق وما ينطاق
والغربه ياديرة هلي
تره الغربه شقا وفراق
***
علّي ياشراع الأمل
وُدوريابلم صوب الفريج
بسي ياسنين القهر
بسي ياملح وبحــر
السيف ينطرني والأهل
يبابهم شيله تمر ابكل طريج
يبابهم صقلاته مزيونه بفرج
من لقى عقب السفر خل وصديج
***
دُور يابلم صوب الفريج
راوني بيارق النشل
والبخنق اللى زهى بااللمعه من زين الزري
ولمة الناس العصر
حزة الرده على السيف الجبير
راوني اقلوب اينعت
يوم انبتت
فيها الموده للغني
واكثر بعد حق الفقير
والكل يسير
وانا على وعدي معاج
ياديرة الطيبين
رجعت واشواقي مكثرها
كثر ودي ... كثر لسنين.
إبراهيم الأنصاري
*****
صوت المحرق
يالمحرق ...
يابيت الروح ... ونبض القلب
ودنيا من الرضا ... وأحساس
ياسدرة حوشنا وطيور
ترفرف بالمحبه ، وفيّ ...
يضرّي الناس
ياكون الذكرى والأيام ... وألعابي
خشيشه ... وقيس ... وقلينه
ودبيج أطفال تتسابق ... وأميمه تنادي أحمد
وتسقيـنا ... أقطيرة ماي
وانا آضحك ... وآتسلى مع أصحابي
***
يالمحرق ...
ياسكه تمشي فى أعماقي
ياصوت نهام فى سهدة ليل
ودحة ماي ...
تساسر لهفة أشواقي
ياماي العين وروح الروح ... ودمي
انتي أمي ...
وفى الحشا نخله وجذور
وفى الضمير ذات ومعزه
وطِيب من عطر الجدود
يسري فى الروح والفؤاد
***
بس فى ليله ... من ليـــالي الموت
ظلمه ...
هب على زرعج ...وبحرج ...
والندى ... اللى فى جـــــوّج ...
سرب من دنيا المآسي ، والعذاب ...
أقتحم فجر الأماني ، فى سمانا ... والسكون
وأستحل البيت ... وهدوء الأماكن والنهار
دنس أحلامج وشمسج والتراب
وبيّض فى حلاة الماي ... وملح السيف
وخلا شطآنج يّباب
الغريب اللى على غفله توّطن فى البرايح
ياحضن البلاد
طيح الراده واستباح الدار
باق صك البيت وقفول الميالس
والفريج ... اللى ربينا فى حنانه
وفى أمانه ...
غيرّ ألوانه
ونفث فى عيونا من حقده رُماد
***
المحرق مب فى حاجه حق أسامي
من ورا الغيمه تجيها
المحرق مب فى حاجه حق أوادم
تنتمي بس بحجيها
المحرق تبي كل عيالها فيها
تبي ناسٍ تفتديها
بالروح والفدا والإنتماء
موجة الترحال ، والتهجير ، والتفتيت
قفضـــت لمداد ...
وقعدات الضحى ... ولمة نسوان الفريج
وكورار لطيفه
ولدلاّل ... لدلاّل ...
ماعادت تفوح بزعفران وهيل
والقهوه ... عافت لونها ... وفنايل المواجب والأصول
والمساند ... من غير طوفه تتوّجى عليها وتسندك
الفرحه ماتت ... والعذارى ترّملت
يتمــــــــوّنا ...
يتموا عيالج يايمّــه
شتتوّنا ... غرّبونا
سكننونا هناك فى المنفى بعيد
صــــرنا ما نعرف بعضنــــا
صــــرنا مانــوصـل أهلــــنا
صـــرنا ما ندري بربعنــــــا
تلو عروقنا الطريه من دفا رملج ومايج
وبدلوها بكومــــة سميـــتٍ وقــــــــــار
المحرق أم ماتترك ضناها
تدري عنهم ... منهو راح ومنهو جاها
ومنهو فى الشده معاها
ولو الزمن مره سألها
عن أملها وعن رِجاها
تقول لمحرق : لأهلها
تقول لمحرق : بأهلها
بس بأهلها ...
تفرح وتضوي سماها
تكبر ويزهر عطاهــا
وتبقى لى يوم المعاد
أرض المحبه والصخا والعز
وفخرٍ للبلاد
وتبقى لى يوم المعاد
أرض المحبه والصخا والعز
وذخرٍ للبلاد
إبراهيم الأنصاري
*****
ربينا صغار
ربينا صغار على ترابج ... هوينا اسمج تعلمنــا
نحب الناس .. كل الناس .. نحب اللي يحب فنج
تعلمنا ... تطبعنا ... نود الخير حق الغير وحق اهلج
وكل ماله ياالدانه يزيد فينا هواج اكثر
وكل ماله ياالدانه نحس انج وطن غالي
يعيش فى قلوبنا يكبر
يسامرنا ... يواسينا ... يمنينا ... يقربنا
لوعنج تباعدنا ...
وخذنا الوقت وفرقنا
ولو إنا ... غصب عنا تحولنا
و رحنا بعيد
و عند غيرج توطنا
ولقينا ناس وحبونا
وعرفنا أحباب وعزونا
بقيتي انتي . . رغم كل شي
يا شمس وفَي
وسط قلبي تسكنين
تزرعين الحياة فيني . . تدفعيني
اعيش هالدنيا واتعلم
وادري انج بعد تدرين
مَرَديّ يوم ارجع لج
مثل لوّل ... طفل يلعب على ترابج
طفل ودّه يعيش يمّج
يبات الليل في أحضانج
تربينه . . تبارينه . . تحاتينه مثل أمّه
طفل محروم و متغرّب يحن يشتاق حق ضمه
تضمينه وتغنين . . تفرحينه وتفرحين
وليما الحين . . ليما الحين
بُقيتي أنتي . . رغم كل شي
يا شمس وفيّ
وسط قلبي تسكنين
وكل ماله يا البحرين يزيد فينا هواج أكثر
وكل ماله يا البحرين نحس انج وطن غالي
يعيش في قلوبنا . . يكبر.
إبراهيم الأنصاري
*****
ربيتــي فيني الخيـــــــر
خلــي الحجـــي للغيـــر تـــدرين ماآجامـــــل
ماعرف آصف حروف وبيتيــــن بالكامـــــل
كل الشعـــــر قــــــــدّر ياخيــر من حبيــــت
إحساســــــي مايقـــــدر يصغر فى جمٍ بيــت
ربيتــي فيني الخيـــــــر والطيبـه والاحساس
من حبــج انتــي بــــس حبيت كـــــل النـاس
عزي وتـــاج راســـــي أهلــــي وكل ناسـي
مزروعه فى احساســي انتـــــي ياالبحريــن
ربيتــي فيني الخيـــــــر والطيبـه والاحساس
من حبــج انتــي بــــس حبيت كـــــل النـاس
كل شي يصير صغيـــر وتضيع معناتـــــــه
لى قالوا فى البحريـــــن فى شي مثلاتــــه
حتى القمر لــــــى راح حق غير يمعتنـــا
وده زتـــــات يغيـــــب ويـــرد ديرتنـــــا
لكنه فى البحريـــــــــن وده يتم سهـــران
وده يتـــم ضـــــــاوي ويسامرالخــــلان
حتى النخل لى صار فوق العذق بسره
وده يشق الارض ويعطي الوطن بشره
يعطي الفرح ويرد يطرح ثمر للناس
ويقول ياامي انتي الأصل والساس
ربيتي فيني الخير والطيبه والأحساس
من حبج انتي بس حبيت كل الناس
إبراهيم الأنصاري
*****
تسلــــم
ياعطـرٍ من عبير جــنان ... وياقطرٍ من غـــديرعــيـــون
ياسعدٍ زاح كــل لحــزان ... مكانك ، منـــزلـك ، لعــــيون
رخيصه الروح والأبـدان ... فـداك ، ياجوفنا ... ولعـيون
نــحبك حــب بــوســلمان ... صــغــير وعود ، بــه دارك
ياقــلب الطــيبه ياالإنسان ... حــنانــك للقــــصــــى دارك
جميـله بــحبك الأوطـــان ... وعــزيــزه بعـــــزتـك دارك
وتســلــم ياالــوفي ازمـــان ... يافــيّــنا وشــمســنا ولعيون.
0 تعليقات