❤️ لمحرق ❤️

لدعم نشرة الفنر الثقافية أضغط هنا

شهادة في حب لمحرق

امحرق اهي رضعة العشق الأولى، 

اللى تبقى لآخر نسم..

امحرق بحر حب كلما اتحاول اطال القوع ماله، 

تلقى روحك مالك مريال..

امحرق ثوب تقاليد اوعرف،

 ممكن تلبس فوقه ثوب

 او ثوب بس ماتقدر اتفسخه..

امحرق خلطه،، 

نقوة ناس او خلطة مشاعر،

 لها ألف معنى ومعنى بس مالها تفسير..

امحرق هذي لبيوت المتراعصه ولطوف المسنده على بعضها بعض،، 

والسكيك لمشربكه،، 

اللي مانمر على طوفه وحنا صغار إلا ونرسم قلب مجروح..

 وبراس الفحم نشخط سهم..

 او ماندري السهم وين ايروح....

كلمات الأستاذ/ عيسى محمد هجرس  - الأمين العام لمركز عبدالرحمن كانو الثقافي

********

شلون المحرق

شلون قولي شلون المحرق بتنسونها

وهي ربتكم وسط عيونها

تنكرون الحوش كنا نأكل في ماعونها

شوف حالها 

شوف اشلونها

هذي المحرق أحبها موت

و انا لها مثل غيس و مجنونها

وهذا الطريج في ذكريات

يعني يسخا قلبك تضيعونها

وذيج السدرة تذكروها

حسافه اليوم يقطعونها

ارجوك سلم لي على أهل الفريج

اخاف أتأخر ويدفنونها

حلفت ما انساها و لا اخونها

وهي قصة عشق تعرفونها

لو اتبدل الأماكن و الذكريات

اشم عطر المحرق و اعرف لونها

هذي قصة وطن و قانونها

هناك أجمل بشر وسط كونها

بس ما ادري ليش

ادموعي تنزل من تذكروها

بالله عليكم

حبنا لمحرق شتسمونها

حبنا لمحرق شئ شتسمنها... 

شعر/ اسحاق احمد الكوهجي